3 خطوات لأسرع و أطعم كشري
 |
| الكشري في 3 خطوات بسيطة |
1) المكرونة:
نسلق نوعين مكرونة (مقصوصة و اسباجتي) في مياه كتيرة (يعني الحلة يكون نصها ميه و نصها مكرونة) و نحط مع المياه و المكرونة معلقة صغيرة ملح و شوية زيت (يعني معلقتين أكل تقريبا) و نسيبها لحد ما تستوي.
2) الرز و العدس و البصل المحمر (هنعملهم في خطوة واحدة !! .. ركزوا معايا):
نحط حلة صغيرة ع النار و نحط فيها شوية زيت حلوين و نحمر فيهم حوالي نص كيلو بصل متقطع شرايح (بتاع 4 بصلات كبار كده) .. لما نلاقي البصل اتحمر خلاص طلع تلات اربع كمية البصل وسيب الربع في الحلة زي ما هو .. و تحط على البصل اللي لسه في الحلة العدس أبو جبة بعد ما تغسله .. و شوية كمون .. و مكعب مرقة دجاج .. و مياه كتير و نسيب العدس يتسلق .. أول ما العدس يستوي (يعني نطلع حباية و نشوفها استوت و لا لسه) .. حط الرز الأبيض عليهم و نديهم تقليبة و نسيبهم .. أول ما المياه تغلي وطي النار ع الآخر و نسيب الرز يستوي.
3) الصلصة:
نحمر حوالي 3 فصوص ثوم (يكونوا متقطعين طبعا) في الزيت في حلة صغيرة .. لما يتحمروا نحط عليهم نص كباية خل .. و بعدين ننزل بعصير الطماطم (طماطم مضروبة في الخلاط مش أكتر .. أد إيه ؟ حوالي كيلو و نص مثلا) و شوية بهارات و ملح و نسيبها تغلي.
كده المفروض إن الكشري خلص .. بس عشان أهم من الشغل تظبيط الشغل هنقول على حاجتين مهمين:
* الدَّقَّـة : نفرم حبة ثوم صغيرين و نعصر عليهم لمونتين و شوية خل صغيرين (بتاع ربع كباية كده) و نحط عليهم بهارات و ملح و مياه.
** الحمص : نسلق الحمص .. بقى جاهز الحمص .. بس الفكرة أننا لازم ننقعه في مياه ع الأقل 12 ساعة قبل السلق.
نخلّي بالنا :
- الزيت اللي بيتحط مع المكرونة دا عشان متعجنش.
- لو جينا نعمل الكشري و افتكرتي إنك نسيتي تنقعي الحمص يبقى بلاش منه أحسن عشان هيفضل يغلي 10 سنين و مش هيستوي في الآخر.
- التقديم سهل طبعا .. طبقة رز و عدس .. طبقة مكرونة .. طبقة صلصة (لو بتحط شطة زيي حطها قبل الصلصة) .. و بصل و حمص. و بالهنا و الشفا.
No comments:
Post a Comment