في 3 خطوات بسيطة ، حمام محشي بالرز و الكِبَدْ
 |
| في 3 خطوات بس ، حمام محشي بالرز و الكِبَدْ |
1 .. تحضير الحمام
الحمام بيكون زغلول (يعني صغير في السن) ، أهم حاجة و إحنا بنحضر الحمام هي نضافته ، و عشان كده بعد تنضيف الحمام كويس جدا من الريش هنحط الحمام في ميه فيها شوية خل و لمون عشان الزفارة تروح و بعد كده نغسله كويس
2 .. خلطة الحشو
هنقطع بصلتين كبار في مقلاة فيها شوية زيت و مكعب زبدة و نشوح البصل شوية و بعدين نحط عليهم الكِبَدْ و القوانص بتاعة الحمام (يكونوا متقطعين صغير) ، و نحط مكعب مرقة دجاج و بهارات و فلفل أسود ، نبشر عليهم ثمرة طماطم ، و نقلب دقيقتين تلاتة ، و بعد كده نحط الرز ( الرز بيكون بمعدل نصف كوب لكل حمامة يعني لو بنعمل حمامتين هنحط كوباية رز ، لو 3 حمامات نحط كوباية و نص و هكذا) و يترك على نار هادية قليلا (حوالي 5 دقايق تقريبا) و بعدين نرفع الخلطة من ع النار.
3 .. الحشو و السلق
نحشي الحمام بالخلطة اللي عملناها (بعد الحشو لازم نقفل فتحات الحمام اللي في البطن و عند الرقبة ، أحسن طريقة من وجهة نظري لسد الفتحات هي خلة سنان للرقبة و نسد البطن براس الحمامة و طبعا في طرق تانية كتير) ، نسلق الحمام في ميه كتيرة و مع ميه السلق نحط حبهان و فلفل أسود و بصلة و ملح ، أول ما الميه تغلي نهدي النار لحد ما يستوي (الزغاليل بتاخد حوالي 20 دقيقة عشان تستوي) ، و بعد كده التحميرفي الزيت مع مكعب زبدة و يقدم مع الأرز و بالهنا و الشفا
في كام ملحوظة كده ..
- الرز اللي هيتبقى من الحمام بعد السلق ممكن نسويه زي الرز العادي بالظبط (لو الميه نقصت بتاعته نزودها و نهدي النار عليه خالص)
- لو هنعمل ممبار مع الحمام .. ممكن نسلق الممبار في الميه اللي متبقية من الحمام
- لو عندك فكرة ذكية بتعملها أو سمعت عنها قولهالنا
No comments:
Post a Comment